Deutsche Wohnung
الموعد :
رح يوصلك نفس هاد الايميل انو عندك موعد بهي الشركة او ايميل بيشبهو انو صار عندك موعد .
للاسف بهي الشركة ما بيذكرو تفاصيل البيت يلي قدمت عليه لذبك ما رح تتذكر عدد الغرف و مساحة البيت والاجار لانو غالبا رح تكون مقدم على كثير بيوت .
بكون بالموعد بين 5 و 30 شخص انت وحظك .
صورة الايميل :
بعد الموعد :
ملاحظة جدا مهمة :
بعد الموعد انت لازم تبعث ايميل للموظف وتخبرو انك مهتم بالبيت .
ايميل الموظف يا بكون نفس الايميل يلي اجى في ايميل الموعد ,
يا بكون مذكور الايميل ضمن ايميل الموعد يا الموظف بالموقع بفرجيك ورقة فيها صورة ايميلو وانت عليك تصور هي الورقة بالموعد .
بس تطلع من الموعد بتكتب ايميل انو عندك اهتمام بهي الشقة بتذكر عنوان الشقة بشكل مفصل وبترسل الايميل.
بعدها رح يطلبو منك تعبي هاد الملف وترجع ترسلو للموظف نفسو .
شرح الملف كامل بالاسفل .
رابط تحميل الملف :
ملاحظة بتخص صفة رقم واحد :
هي الصفحة غالبا بتوصلك معبية من الموظف و بكون فيها موصفات البيت كاملة .
انت ما مطلوب منك تعمل فيها شي .
عبي من صفحة رقم 2
ممكن يطلبو منك ترسل هي الاوراق مع هذا الملف ... يعني بنفس الايميل ترسل اوراق اضافية .
الاوراق يلي لازم ترسلها :
هويات كل افراد البيت
براءة الذمة من صاحب السكن وما تكون اقدم من 6 اسابيع
اخر 3 كشف راتب في حال بتشتغل
او بيشايد الجوب سنتر ... لا تنسى تصور كل صفحات البيشايد .
في حال البيت بدو wbs لازم ترسل نسخة منها .
مرحلة التوقيع :
في حالة اختاروك لتاخذ البيت :
ببعثولك ايميل او ايميلين انو هنن اختاروك لتوقع العقد .
واحد منهم اسمو :
Reservierungserklärung
وهاد بجي معلو ملف pdf ... بتلاقي في كثير معلومات عنك و عن البيت .
الايميل الثاني مو مهم .
و ممكن يوصلو الايميلين مع بعض ... مافي مشكلة .
هلا بهي المرحلة ما عليك تعمل شي ابدا .
هنن فقط عم يخبروك انو تم الحجز البيت ئلك و لازم تحمل تطبيق الشركة الخاص فيهم لحتى توقع العقد بس يوصلك .
حمل التطبيق من متجر التطبيقات على موبايلك ... اسم التطبيق :
DeuWo Digital
بعد كم يوم بيوصلك ايميل جديد .
الايميل بجي جواتو ملف pdf ..... هاد الملف ئلو كلمة سر لحتى تفتحو .
كلمة السر بتكون الرقم البريدي ل سكنك الحالي .
وغالبا هاد الرقم بكون متكون من خمس خانات . مثلا :
12345
جوات هاد الملف في رقمين مهمين جدا :
لازم تنسخ الرقمين وتروح على تطبيق الشركة يلي نزلتو, و دخلهم هنيك بقسم توقيع العقد .
هي صورة الايميل يلي بجي جواتو ملف ال pdf المهم :
رح يوصلك ايضا هاد الايميل وفي شرح كيف لازم تتعامل مع التطبيق :
الشرح :
حمل التطبيق يلي حكينا عنو فوق .
اختار Mietvertrag online abschließen
أعمل حساب جديد على التطبيق .
بعدا روح على ايميلك و أكد الحساب .
بعد رح يسألك هل حصلت على كود.
رح تختار Ja
بعدها رح تتطلعلك هي الصفحة :
دخل هي المعلومات بشكل صحيح ... من وين بتجيب هي المعلومات ؟
من ملف ال pdf يلي وصلك ب الايميل .
ملاحظة :
بعض الاشخاص ممكن ما يفتح معهم اذا دخلو المعلومات ... الحل :
فقط ارسل ايميل للشركة او اتصل عليهم و بحلو المشكلة فورا
بعدها رح يفتح معك التطبيق بهدا الشكل :
شرح الخيار الاول :
الخيارات الثانية :
انت رح تلاقي طالبين اوراق غير يلي معك ....
مثلا براءة الذمة شكلها غير شكل يلي معك ... انت ارفع يلي معك بيمشي الحال .
كمان موافقة الجوب سنتر ... ارفع النسحة يلي معك .... طبعا في حال ما كنت جوب سنتر لا ترفع شي وترك الخيار فاضي .
الخيار الاول و الاخير هنن نفس بعض ... بس اذا معك هوية المانية ارفعها ب الخيار الاول .
ورقة الكاوتسيون وقع عليها و ارجع ارفعها كمان .
وين ممكن تلاقي هي الاوراق لحتى توقع عليها ؟
بنفس التطبيق ... بكونو ضمن الملفات بس دور عليهم رح تلاقيهم بسهولة .
-------------------------------------------------
اخر مرحلة :
بعد ما تخلص و تضغط موافقة ... هيك بتكون وقعت العقد و مشي الحال ...
هلا التطبيق ما رح يرجع يفتح لحتى هنن يتأكدو من المعلومات يلي قدمتها .
بعد كم يوم بيوصلك ايميل انو كلشي تمام و حاليا صار فيك تفتح التطبيق وتحمل العقد .
وتاخذ نسخة منو للجوب سنتر ... في حال كنت جوب سنتر .
ملاحظة :
هي الشركة رح تبعثلك موعد لحتى تشوف الهاوس ماستر وقت استلام البيت ... يعني انت ما رح تروح على الشركة ابدا ... كل التعامل مع هي الشركة يا عن طريق الايميل يا عن طريق التطبيق الخاص فيهم .
ملاحظة 2 :
في حال كنت جوب سنتر لا توقع العقد ئلا تكون معك موافقة الجوب سنتر .
ملاحظة 3 :
غالبا ما تستلم البيت ل قبل بيوم من سريعان العقد .
في شركات بتسلمك البيت قبل ب 15 يوم من بداية العقد لكن هي الشركة غالبا بتسلمك البيت
قبل بيوم واحد فقط من بدأ العقد .
وبنفس الموعد رح تعمل البروتوكول تبع قراءة عداد الكهربا و المي و الغاز اذا البيت على الغاز .
في حال كنت جوب سنتر .... لازم ترسل نسخة من هاد البروتوكول للجوب سنتر مع نسخة العقد .
بتوفيق